【搵食好去處】葵廣孖寶車仔麵 一碗麵食出香港百味

【葵涌廣場】大家都知道係美食天堂,五花八門嘅小食店都有,但位於葵涌廣場地下一間經營超過10年的【孖寶車仔麵】以快同平取勝,主要賣車仔麵同港式小食,配料都係傳統口味,佢哋自己辣汁同埋秘製醬汁都係好出名。價錢都想當便宜。呢間舖嘅老闆亦都相當有人情味,喺疫情嚴重嘅時候向市民發派口罩同埋漂白水!


車仔麵三餸麵餐$46送熱飲,其實而家好少車仔麵檔可以做到,仲要喺葵涌廣場咁旺嘅場都真係算係好抵食。

小編今次就同屋企人叫咗豬大腸同牛腩,都係非常之入味,每次食車仔麵我係必定會食蘿蔔,鐘意佢個蘿蔔都好夠林又夠晒味。

個秘製醬汁,係非常之受歡迎,個重點仲要係唔辣,鍾意佢嗰個甜味啱啱好,鐘意甜辣嘅朋友岩哂,我家小朋友就比較鍾意食呢度嘅滷水蛋 。醬汁同埋滷水蛋都係可以分開上㗎。

食車仔麵當然唔少得菜甫啦。有辣有唔辣,任君選擇。

個凍檸茶好好飲⋯佢個茶都做得好好..唔會話太澀,不過就有少少甜!怕甜嘅朋友自己叫小甜啦。

仲有好多港式小食,例如魚肉翅、牛雜、魚蛋、燒賣、腸粉,各式各樣嘅滷水等...

店舖入邊有唔同大大小小嘅掛畫,都係懷舊香港為主題。

大家如果經過葵涌廣場都可以試吓呢一間又地道又平又好食嘅店舖!真係一間良心店舖黎㗎。

地址:葵芳葵涌廣場地下A 15號舖

港鐵站D出口